〔 韓國自由行 〕坐地鐵必備 T-Money 超詳細解說

之前講完去首爾玩,換錢坐車出市區的要訣,如果心水清的讀者,都應該記得我提過 T-Money (即是韓國的八達通),無論坐車、便利店購物都可以用。其中如果自由行又要經常坐地鐵,就更加要有,因為在韓國好多人都有 T-Money ,要去車站買飛,有是有,不過要搵一大輪先搵到,有張 T-Money 方便好多倍。

點買?

同香港一樣,差不多所有便利店都會有 T-Money 賣,一落機即時去機場入面間便利店買?等等!其實 T-Money 卡都有好多種,有一種是普通卡,即是普通的八達通卡;另一種就是同其他公司合作推出的合作卡,例如可以儲分的 POP T-Money 、與樂天合作推出的 cashbee 等,多到數不清。而不同卡的價錢都有不同,好似 POP T-Money 機場賣4000won,而一般普通 T-Money 卡只需 2500won ,價錢差一截。

GS25
機場一出就有間 GS25 ,飲飲食食就無問題,買 T-money 就要問清楚先好買。

如果價錢一樣,又是否一定要揀合作卡?其實有就最好,無亦毋須強求。點解?因為合作卡雖然有優惠,不過通常是儲分,亦都要有韓國身份証先可以證記,更要夠1000分以上先可以換優惠,再加上優惠有時限性,到你可以換又不知適不適合用…….(算把啦,去幾日旅行啫)。

T-Money
呢張「Pop卡」賣成4,000won,見到都忍唔住講句「Pop卡」。

要入錢先用

買完張卡,準備入閘,閘口閃紅燈?Sorry,無提你手上只是空卡,即是要入錢先用得。想即買即用可以即時在便利店入錢,不過撞正驚青……唔係…..係好人阿叔至真,入錢之前會用韓文問你一大堆問題,好,你贏!點算?去地鐵站。

T-Money
通常 T-Money 會放喺收銀附近,有好多種不同公仔揀,不過愈靚價錢愈高,呢張cashbee就賣2,500won。
T-Money
其實韓國 T-Money 都設計得幾靚,亦都不時轉款,八達通應該學習吓。

其實九成九地鐵站(我都未去均首爾所有地鐵站,唔敢百分百保証),都會有增值機。通常分為兩種,一種新式,有中文提示你點做,另一種是舊式,得掣襟同數字顯示。因為有部分舊站可能只得舊機,所以兩種都會教你。

T-Money
新 T-Money 增值機,大大部好易認。
T-Money
舊 T-Money 增值機,好似細個士多啲簡單遊戲機。

T-Money 新機增值方法

1. 新機全部都用輕觸式屏幕操作,只要按下方「中文」,就可以變成中文介面。

T-Money

2. 之後就按最右方的增值圖示。

T-Money

3. 然後就會提示,將 T-Money 放入屏幕下方中間卡槽內。(如果已經早一步放入,此步驟會跳過。)

T-Money

4. 之後就可以輸入增值金額,通常都是選10,000won或5,000won多。

T-Money

5. 然後當然要入錢…….

T-Money

6. 入完錢,等一陣畫面就會話你知你充值前有幾多錢,充值後又有幾多錢,之後就可以拎卡走人。

OLYMPUS DIGITAL CAMERA

T-Money 舊機增值方法

1. 首先將 T-Money 放入下方的卡槽。

T-Money

2. 之後直接㩒要增值的金額。

T-Money

3. 入錢!

T-Money

4. 搞掂!留意上方顯示,第一個是未增值前餘額,中間是增值金額,之後是增值完成後的餘額。

T-Money

入閘前check一check

其實無論新機或者舊機,都可以放張 T-Money 落去查餘額,如果坐地鐵(應該七成以上都係)最好入閘前檢查夠不夠錢。因為韓國地鐵,會分兩段收費,當入閘時會先扣基本的1,250won,而超過一定距離,出閘時會再收錢,所以經常會出現入閘夠錢,出閘無錢的問題。所以最好先利用地鐵app睇車費,再入閘前確定夠不夠錢,就可避免出閘時考驗自己的身體語言有幾好。

另外,T-Money 內的餘額是可以退,只要走的時候搵間有 T-Money logo 的便利店就退得,不過,重點是必需要20,000won以下,超過20,000won就要去 T-Money 總部先有得退。而退卡要收500won,如果只剩幾百won,留返張卡當紀念好過。

 

​覺得這篇文章好的話,請讚好我們的Facebook專頁,以獲取更多新資訊。有你們的支持,是我們動力的泉源,多謝。



金仔

熱愛科技(不過無錢玩),亦都鍾意睇動漫(除了少女漫畫),可以話標準宅男一名,得閒就去旅行,飲飲食食周圍昅!

相關文章

?>

yeezy 350 v2 do fashion goods