三百幾蚊真‧無線藍牙耳機? 實測話你知有幾伏!(更新)

近期流行真‧無線耳機,不少大廠都先後推出,不過動不動都千幾二千蚊,對於不少銀彈比較緊的讀者,應該都唔多捨得課金。雖然千元真‧無線耳機都有,但想最平啲啲,無論淘寳或是坊間都有不少二、三百蚊,國產真‧無線耳機出現,究竟這些耳機有無伏?今次特別真金白銀買一個價值三百多元,名為 MEES FIT 1 的耳機進行測試,就知有無伏!

真無線藍牙耳機
睇個樣,係咪同某個牌子好似樣呢…..

點解要講到明係真金白銀?唔係小編小氣,花少少銀都要講,而係買返嚟,至少唔會俾到試到靚聲無事先係你試,咁先可以試到實際有無伏!今次這個 EMMS FIT 1 的耳機,購自葵涌廣場三樓某賣手機配件及電話配件的鋪頭。或者你又有個疑問,點解要試個三百幾蚊,而唔係試最平二百幾蚊呢?因為這款 EMMS FIT 1 是最平支援 aptX 同防水濺,再平兼無 aptX ,純通話就得,聽歌?用返有線好過。

真無線藍牙耳機
張單簡體字嘅?明明香港買喎?幻覺嚟嘅,你嚇我唔到….

癈話唔多講,首先當然要開盒,其實睇包裝,都做得算唔錯,在磨紗膠片之下,會有一對耳機、外置電源充電盒,另外會有一條充電線及另加三對耳塞,其中仲有記憶綿,都算喜出望外!不過,如果使用雙層膠耳塞的話,放入充電盒,耳機會過高頂住無法關上充電盒……

真無線藍牙耳機
睇個包裝,都好正路,仲可以話做得幾靚。

根據說明書的規格,指出耳機的最長的播放時間為 4 小時,而通話時間為 5 小時,支援藍牙 4.2 (HSP、HFP、A2DP及AVRCP),最高 130db 。

真無線藍牙耳機
個盒真係咁寫,不過你信你咪天真嬌囉!

算!都知三百幾蚊無咁筍!先講講個充電位,放入耳機盒,有磁石會令耳機準確拉觸充電位,而充電時會顯示紅色,充滿電會熄燈。充電盒會有條罅可以睇到充電情況,而充電盒上亦會有指示燈,知道個盒有無電,整體都算正路,無咩伏位出現。

真無線藍牙耳機
耳機放入去,都有磁石磁住隻耳機㗎,一啲都唔覺得流!

配對方面,用家只要按實其中一隻耳機,就可以配對到,而這種耳機大部分稱為分離式真、無線耳機,需要做雙重配對,亦即時先配對其中一隻耳機,之後另一隻耳機開機後,再自動配對另一隻耳機,小編首先是配對L耳機(點解要講到咁白?之後你就知……)

真無線藍牙耳機
拎起任何一隻配對都用得?等陣你就知死….
其實配對過程都幾簡單,進入配對模式,開手機藍牙接駁,之後開埋另一邊耳機,就完成配對,全個過程無太高難度。

真無線藍牙耳機
耳機有埋大細聲鍵,原本係好事,但個掣咁細,無好過有。

之後開始試帶,雖然耳機都明抄不少大牌耳機的設計,不過貼耳度差少少,一般出街用,應該都好穩陣,個頭兩邊擰都唔會甩,但係戴住嚟跑步,感覺就會有少少危險……之後,當然開反首歌試聽先!唔聽尤自可,一聽就出事!

真無線藍牙耳機
其實測試後,將個耳機向上戴反而更加穩陣,但講電話,收音咪聲咗,收聲都差咗。

咩事?一首歌R耳機會出現短暫無聲四次!雖然無聲的時間好短,大約近1秒左右,但幾咁都唔係辦法喎!直接用手機駁 R 耳機,睇下有無好轉先!問題似乎好少少,大約三、四首歌出現一次短暫無聲,鬼叫你要平咩!我忍你!

跟住又有第二個問題出現!耳機機身雖然有音量調節鍵,不過粒鍵真係細到無朋友除非用指甲「咪」落去,否則都幾難㩒到…..好彩小弟有智能手錶,做到揀歌同較音量。

真無線藍牙耳機
呢個真係隱藏關卡,唔留心睇,真係鬼睇到!

終於都到音質,應該大家最期待,試聽幾首歌,主要有A-Lin 的《難得》、 BlackPink 的《WHISTLE》及陳奕迅的《好久不見》。先講《難得》,開始時前半部的慢歌部分都算不錯,中高音的平衡做得不錯,空間感都算不俗。不過去到副歌部分,明顯就出現國產耳機最愛-低音過重,有少量遮住人聲的情況。

至於一貫韓國電子快歌模式的《WHISTLE》,對於不少愛電子低音的用家,應該會覺得不錯,雖然未至於澎澎聲,但都幾厚實,如果愛聽低音的用家,應該都會收貨。而全慢歌的《好久不見》,人聲的表現都算細緻,總體上的表現,等同一些百多元的雜嘜耳機,無太大驚喜,但亦都不算差。

真無線藍牙耳機
用個耳機名,連偉大嘅淘寶都搵唔到,呢個都算功能近似…..

至於通話方面,如果接聽電話時,便會變回單聲道,這亦是分離式耳機的特色,通話無太大問題,相信基本野,都好難出事。至於實測的音樂播放電量,大約2.5小時,似乎所講的5小時,亦都是吹水多……

總插而言,這種幾百元的真‧無線耳機,小問題都幾多,雖然售價只有大廠的三分一甚至更低,但這些小問題你又能否接受,又是另一回事,加上質量都頗為參次。小編覺得,如果是純粹當買件玩具玩下,都可以接受,但如果對音樂有要求,還是花多點錢吧!

更新:在室內都有斷線問題,在街上又點?基本上會變成「自動模式現場立體聲」!點解?因為差不多有7成時間,兩邊耳機都無法連接,只能單聲道播放,就好似歌手突然企堆一邊,之後又行返去中間,不停來來回回,係咪好有現場感呢!?

其實出現斷線最嚴重的地方,就是一些人口較密集的地方,受到大廈及其他人手機的無線訊號所影響,而出現斷線,至於在一些比較空曠而又較少人的地方,斷線的情況會較少,但唔代表無。如果你無我咁好幻想力?或者用多一陣,你已經忍唔住將佢掉落垃圾埇面!

 

​覺得這篇文章好的話,請讚好我們的Facebook專頁,以獲取更多新資訊。有你們的支持,是我們動力的泉源,多謝。



金仔

熱愛科技(不過無錢玩),亦都鍾意睇動漫(除了少女漫畫),可以話標準宅男一名,得閒就去旅行,飲飲食食周圍昅!

相關文章

?>

yeezy 350 v2 do fashion goods