【唔怕伏再試】淘寳入手 HK$200 真無線耳機實測 價錢更低又有無伏?(已更新)

上次在葵涌買入三百多元真無線耳機 ,已經伏到無朋友,單是兩邊耳機經常斷線一點,已經難以接受,理論上應該完全受到教訓。不過,阿寳都識講:「人類總要重複同樣的錯誤」,見到淘寳堆真無線耳機平到只要百多元即可入手,好難忍手,而今次測試的是原價 299 人民幣,之後減價至 169 人民幣(約 HK$200 )的力族 W1 (名呢家野,點會得一個,你睇落去就知),究竟又會有什麼結果?下面慢慢講。

真無線耳機
原本都有讖過呢款,但真相又無,假評又多……

淘寳真無線耳機平,一早預計到,老實講大家都知不少香港平價耳機,其實都是淘寳而來,可以話是公開的秘密。既然要買,當然要揀個外型吸引而又多人買,評價都要「正面」先。不過搵完一輪,就會發現伏味好濃,首先第一款是 QCY Q29 ,其實不少香港鋪都賣緊,價錢幾多可以自己睇,淘寳大約 HK$200 ,既然香港賣到周街都有,試嚟都無謂。(除非讀者要求啦!)

真無線耳機
論性價比,這款力族 W1 比較高,而且多顏色可以揀,就試佢!

跟住到另一款叫簡約 K2 ,外型上睇落唔錯,價錢又好平喎,不過睇真少少……全部電腦合成相,真相都無一張,俾你,你仲信唔信佢?結果都係放棄!之後再慢慢揀,半個鐘之後,先㨂到力族 W1。㨂佢原因有三;一是有用家真評價話唔錯,二是有IPX4防水……濺(官方夠膽大大隻字寫 IPX4 防水,勁!),論性價比都算高,三是夠多顏色㨂,紅、藍、白、黑咩都有。

真無線耳機
商品說明條例?大陸有㗎咩?

經過差不多兩星期(真係要兩星期,成個大陸行晒先到香港),終於都到手,一收到個盒……𠵱!?細成咁?一個手掌大細。國內同胞幾時變得如此環保?而盒身標示型號為 TWS-E7 !(老闆,完全違反商品說明條例喎!)算, IPX4 都可以話自己防水,盒面亂寫又有幾奇先!最重要入面同我想買的耳機有無分別。

真無線耳機
呢個真係環保盒,細到呢…..

好彩,耳機個樣就一樣,無搞錯。盒入面有說明事、充電線、三組耳塞(一組已在耳機上),外置充電盒比想像中細。官方無明確表示充電盒可以充到幾多次,但如果以規格數值每邊耳機各55mAh電量計,380mAh的外置充電盒應可以充到三次左右。(真係試過先知) 真無線耳機

05
跟盒有兩個QR Code,其中一個是下載音樂,不過十居其九都是老翻,為保護知識版權,大家就當睇佢唔到。
06
配件並不自多,但都叫做齊全。

即時進行配對,說明書都算寫得清楚,基本上只要跟住程序去做,問題都不大,一次就配對成功。反而沒有上次入手的國產耳機,兩邊經常配行出現問題的情況,似乎內銷產品,果然不同。經過上次的經驗,首先當然試連接能力,開住歌通屋走,試試連接訊號,竟然喜出望外,隔住一個實心牆的情況之下,竟然無斷線!好多大牌藍牙耳機都未必做得到,不過,又開始搶心訊號太高,會唔會生癌……(真係犯賤……) 真無線耳機

10

至於配戴的舒適感,其實都算不錯,初試十五分鐘,都算穏陣,沒有散脫感。之後試聲,先試慢歌,由 A-Lin 的《難得》試起,發現低音雖然都是一貫較重,但不像之前的重,人聲的空間感亦算不錯。而三音中,以低音最突出,之後到高音,人聲反而有點縮後的感覺,但整體都算舒服。至於細緻度?兩百多元來說,不算好高,但至少不會有「炒埋一碟」的感覺。  真無線耳機

07
個外置電池盒比想像中細,都真係幾擔心電量…….
08
雖然睇落簡單,但都有磁石幫耳機定好位充電,唔怕走位充不到。

反而值得一提的是,可能由於耳機未煲過,所以聽歌時會出現輕微的小雜音,這種雜音並不明顯,亦不會長時間出現,大約出現五至六秒左右,但由於是慢歌,如果細心留意,其實都會聽得出。之後,試一試中板快歌,就以泫雅同賢勝的《Trouble Maker》做測試,一開始一小段左右聲交替的電子音樂,意想不到又可以交待得到,而低音都不用多說,夠強。

09
事先聲明,有 Logo 的並不是按鍵,下面細細粒先係,咪學我走去按住開機!而除了開關機,聽歌時按一下暫停,連續按兩下飛歌。
11
長按開關鍵可進行配對,紅藍互閃,不過按住時手指遮晒,根本看不到閃咩色燈。

再試埋Big Bang 的《Bang Bang Bang》韓國演唱會版,面對觀眾聲與歌手聲同時出現時,開始有少少混合不清的情況出現,不過值得一讚的是空間感,以二百元耳機來說,都算做得幾好,在多重不同聲音下,仍感覺到一定的立體感。唯一是在約3分鐘打後連續鼓聲及低音混合時,略為有點混亂,但整體上都算合格。

12
都幾fit耳型,做運動都不怕跌。

不過,咪安心住,試埋出街先講!

實際拎出街試用,隔音一般,基本上如果在沒有播放音樂下,外界聲音都相當清楚聽到,而播放音樂時便沒有此問題,如果想隔音再好,便需要更換成隔音海綿先得。而連接的穩定性,都算不錯,由坐車至在街上,只出現過一次連續三次斷聲,與一些高級的真無線耳機相若,都算穩定,只是電量不足時,接收的能力都會有所下降,距離手機大約五米左右便有機會斷線,需要留意。

不過,電量方面就比較大問題,因為官方稱可以支援 3 小時的播放時間,但實際使用下耳機的連續播放時間只有大約1.5小時,並不算長。好彩的是電池盒充滿三次都仍有電,大約充45分鐘便可以充得滿,用一日其實都夠用。值得一提的是一般真無線耳機放到電池盒內,便會自動關機及充電,但這個力族 W1的耳機,就算放回電池盒之內,都不會熜機及自動充電,而需要按下充電盒內銀色按鍵才會充電,好處是不會亂充耳機搞到充死電池,但如果趕時間就咁放個耳機內盒,就可能會播放播晒電量而又不會充電,下次就未必有電可以聽歌!

​覺得這篇文章好的話,請讚好我們的Facebook專頁,以獲取更多新資訊。有你們的支持,是我們動力的泉源,多謝。



金仔

熱愛科技(不過無錢玩),亦都鍾意睇動漫(除了少女漫畫),可以話標準宅男一名,得閒就去旅行,飲飲食食周圍昅!

相關文章

?>

yeezy 350 v2 do fashion goods