〔 韓國自由行 〕飛機落地兩事必做 首爾換錢坐車小貼士(Part 2)

〔 韓國自由行 〕飛機落地兩事必做 首爾換錢坐車小貼士(Part 2)

2015-09-04 Off By 金仔

講完換錢,就要講坐車,通常去得 首爾 ,都一定會在仁川國際機場落機(癈話少講@#$%!),而由仁川機場去市區,主要有三個方法,第一是坐機場巴士,第二是坐AREX(全名Airport Railroad Express,近似香港的機場快線),第三種是小記都未試過的坐的士,所以主要集中講前面兩種方法。

首爾

一出機場就會見到一堆機場巴士站。

首爾 坐機場巴士

坐機場巴士,最大的理由,相信是近!因為一出機場,已經見到一堆機場巴士站,差不多大部分地方都可以坐機場巴士去到。而要搵路線,最好在香港先睇機場巴士主頁(有中文選擇),入面將到達到地方以地區區分,好易搵到路線,搵完之後記住巴士號碼同站頭位置就得。而大部分巴士頭班車在上午05:00左右,坐通宵機都可以落機即出市區。

站牌其實有大大個巴士號碼,睇清楚先好排隊。

至於價錢方面,由7,000won(約$46)至15,000won(約$99)不等,視乎遠近,而大部分港人選擇的民宿,車費大約10,000won(約$66)左右。每一個站頭都會有個大叔,主要負責搬行李上車同叫你排隊,不過有問題,亦可以問他。至於站牌上,會有齊班次時間及落客站地點,可以再次確認自己在第幾個站落車。

而巴士到站之後,大叔就會幫你搬行李上車,之後就會俾張紙你,張紙一定要收好,因為落車拎行李就靠這張紙,如果遺失,最少要花15分鐘先拎得返行李(雞同鴨講加搵行李)。上車後只需要把車資放入錢箱即可,每部巴士都有下一站提示,不過有部分車只得韓文同英文,怕錯過最好上車同司機講在哪個地方落車,就最穩陣。

 

首爾 坐AREX

如果怕坐巴士,都可以揀AREX,好處是車廂有齊行車位置提示,一睇就算去緊邊個站。而且最近做優惠,坐直達列車成人只需8,000won(約$53 / 原價14,800won,約$98),而且有埋電動車送你過去,又有人幫手搬行李,仲有個休息室俾你抖。

坐直達列車夠舒服,不過價錢相對會貴少少。

如果想更抵,仲有普通列車可以揀,等同坐普通地鐵一樣,以分站方式收貴,最貴都不過是要4,150won(約$28),最大分別就是要自己行去車站,大約要行15分鐘左右。至於休息室、放行李位等等,全部都無,如果行李不算多(去時不多,走時難講……),都可以考慮。而選擇坐普通列車,就最好在機場便利店買定T-money(即香港的八達通),無論是坐普通列車還是之後行程都一定用得著。

伸延閱讀:〔 韓國自由行 〕飛機落地兩事必做  首爾換錢坐車小貼士(Part 1)