〔 金仔韓遊 〕 首爾站樂天超市  必到三大理由加推介必買品(Part 1)

〔 金仔韓遊 〕 首爾站樂天超市 必到三大理由加推介必買品(Part 1)

2015-09-09 Off By 金仔

去自由行,通常都會行超級市場,點解?因為可以睇到當地人的飲食習慣之餘,更可以比較平的價錢購物,所以一定要去。而去首爾都一樣,不過,當然要揀夠大間,先可以令你進入瘋狂Shopping mode,預行幾個鐘先夠開心。如果問到 首爾 大型的超級市場,首選當然是首爾站樂天超市,去的理由有三個,加埋旁邊的樂天outlet,絕對夠你行足半日!

理由一:夠齊夠多

其實有去過韓國自由行,都會去樂天超級市場,基本上周街都有,不過講到最大間就必選首爾站。到底入面有什麼好買?由廚房用具、十蚊店、調味料、飲品,基本上你在香港大型超市見到的種類,都可以在首爾站的樂天超市搵到,而且更會有化妝品賣(雖然我未試過在樂天超市買化妝品,通常會在明洞買)。

首爾站樂天超市

雖然門口比較細,不過都不算難搵,最重要是認住LOTTE Mart幾隻字。

點去?

只要由首爾站1號出口,坐電梯直上,見到樂天outlet大門口之後,再向右行,就會見到樂天超級市場(LOTTE Mart)的入口。而去超級市場,一定要留意營業時間,由早上10:00開到夜晚12:00,但緊記這間超級市場每個月第二個星期及第四個星期的星期日,都會休息,計劃時一定要記住!

 首爾站樂天超市

入到超市兩側,都一定有儲物箱,想輕輕鬆鬆行就最好寄存,寄存機有中文,好易用,但夜晚去通常都無儲物箱用。

行程安排

營業時間知道之後,應該幾點去最好?金仔分享一下自己的安排:由於我去韓國,都會去五日至七日,所以通常都會揀第一日的上午或夜晚,預一個鐘去樂天超市行一圈,先買點零食、飲料同日用品足夠行程使用,順便睇睇有什麼特別物品想買,到最後一日會再預兩個鐘或以上,再去樂天超級市場血拼!因為超級市場太多東西都想買,所以最好有個小小的緩衝期,否則好易買到爆喼!

而入到樂天超級市場,首先就要行去儲物箱,入面有大箱有細箱,基本上跟住屏幕指示做就得,好簡單,而儲物箱最多只能夠放3個小時,所以記得捉緊時間入去!另外,購物車要入個100won硬幣先可以推走,用完之後,放返原位,再用前車的鎖扣仔一插,就可以退回100won。

首爾站樂天超市

其實日本、韓國都經常會搵男明星代言衛生巾,原因好簡單:買的都是女士囉。

首爾站樂天超市

入面有小型food court,行到攰都可以坐一陣。

 

金仔韓遊 〕 首爾站樂天超市必到三大理由加推介必買品(Part 2)