[遊日情報]大阪必食 |超濃味蝦湯拉麵

大阪有名的拉麵鋪，可能好多人都會數金龍拉麵、一蘭、四天王。但人人都去食，點顯得自己識食？快快去幫襯這間開張半年的海寶拉麵啦，照牌菜オマール海老蝦湯拉麵，食完包你覺得搭廿分鐘車來食都抵。

海寶拉麵店距離大阪難波都有段距離，必須在梅田站搭阪急線去螢池站，再行五分鐘先去到。雖然頗花時間，但食完之後，就認真想食多幾次。今次去幫襯時可能太晚，照牌菜オマール海老蝦湯拉麵由於是每日限量，已經售罄，唯有試食湯底一樣的海老味噌叉燒拉麵。先試試個湯底，由魚介系變奏出來的蝦湯味道超級濃郁，由三種蝦加豬骨熬出來的湯要俾爆Like，五花腩叉燒厚切得來又夠入味同腍，再加上麵身彈牙，成碗麵實在太好食。可能大家會奇怪為何碗中有檸檬，但其實這幾片檸檬有點睛作用，因為蝦湯實在太濃，食到一半可能有膩的感覺，這時只要用筷子擠出檸檬汁，湯味即時變爽，910yen食到如此好味多變化的拉麵，簡直抵爆。