宅男去東京，一定會去秋葉原同中野朝聖，至於 大阪宅男街 ，就位於日本橋站前的高島屋博物館附近，雖然規模不及秋葉原，但買模型同中古遊戲，就點都要去逛逛。識得搵，仲可以買到好多筍貨。
不似秋葉原一出JR站就到， 大阪宅男街 要行約十分鐘先到。最容易的方法，是從日本橋站5號出口去，一上到地面只要一直走，當見到斜對面有間高島屋博物館，表示行多兩個街口就到。
少時幾蚊隻
不介意玩舊game，或想儲番以前的至愛遊戲，絕對要入A-Too，一樓主要擺家庭遊戲，由最新的PS4、Xbox One，至到PS或任天堂卡帶遊戲都有。部分舊game平到笑，有心機搵好易執到筍貨，例如PSP的《AKB1/48》系列遊戲，最平竟然180yen一隻！另外三樓的CD部亦是蟹貨重災區，特別是少女時代的CD，100yen就有交易，是咪有問題？
特別版遊戲機
店內都有中古遊戲，又是尋寶時間，例如我就搵到《Final Fantasy XIII》只售680yen。不過，這間GEO鋪的重點是之前發售過的特別版手提遊戲機，售價無特別貴仲好平添，例如N3DS的《Love Plus》女主角造型機，都是九百幾蚊港幣有交易，Sony Xperia的初音版手機亦只售24,800yen，抵玩喎。
七八折買高達
Super Kids Land應該好多人都聽過，事關店內專賣高達模型，而家店內已主打賣緊剛播放的《機動戦士ガンダム鉄血のオルフェンズ》模型。除了外牆的全大高達，扶手電梯上二樓的高達鐵拳亦是必影景點之一。店內的模型通常都有七至八折，掃平貨至啱。就算無特別模型想買，亦可慢慢細讀貨架上的砌模型指南，圖文並茂不懂日文都有得著。
平食燒豬飯
如果肚餓，其實近近地在高島屋博物館下面的東京チカラめし都幾抵食，一碗燒豚肉定食都是630yen，燒得惹味又平，慳錢一族不用次次都食松屋或吉野家。
