〔 金仔韓遊 〕 新川「 無限牛 」任食靚牛肉 入口即溶牛迷必到

〔 金仔韓遊 〕 新川「 無限牛 」任食靚牛肉 入口即溶牛迷必到

2015-11-27 Off By 金仔

去得韓國,必食烤肉,其中烤牛肉更加不能少,不過,牛肉在當地都算貴價品(當然比日本都仲叫平),所以就算行兩步就有烤肉店。但要平質素又好的生肉,就一定要推介新川(前馬場洞)的무한소(無限牛),只需百幾蚊就食到入口即溶的牛肉,仲要任食喎!去邊搵先?

*由於小編去時仍未搬遷,所以只得舊鋪相,不過資料已更新。

在韓國烤肉店,好多都只會提供質素都比較差肉牛(由韓國生產,但肉質較差,價錢相對較低),所以通常去平民烤肉店,我都比較鐘意食醃好的牛肉多過新鮮牛肉,因為至少不會似食香口膠。至於對韓國有一定認識的朋友,都會去馬場洞(地方名,無馬跑㗎!),因為當地有一個牛肉批發市場,除了可以買到新鮮靚韓牛(經認證的高品質牛肉,肉質同脂肪比例拍得住和牛)之外,行到市場中間都有不少食烤牛肉的鋪頭(真的只有牛肉吃,想吃其他肉可以嘗試同店主溝通,通常都會幫你落樓下買,照收買價,無收貴你),會以牛肉的等級同埋重量收貴,一盤大約由百幾蚊至四百幾蚊不等(以香港人食法,百幾蚊碟的牛肉,一個成年男人應該唔夠飽),但肉質就一定好過平民烤肉店好幾倍,對於花得起錢又想食得豪的人,會比較適合。

雖然馬場洞食靚牛肉已經比較抵,不過,以去開韓國的消費印象,都算比較貴。而且豪都總不能日日都豪,仲要扮豪搞到餓肚皮更非本人宗旨。要食當然要任食韓牛,先叫得做抵,而最出名的,可以去由馬場洞搬到去新川的무한소的任食韓牛。先報價,每位 25,000 韓圜(大約 $169),兩位以上入座,限時兩小時,完全是漢X苑價錢任食韓牛,認真超抵。

無限牛

特別鐘意這個醬汁,帶有好輕微辣味又不太咸,非常醒胃。

由於무한소在韓國都有一定知名度,所以夜晚會超多人,要排隊先有得食,至於中午時間會少人好多。坐好之後,其實店員都會自動準備食物。一上枱就有등심(牛肋脊)、차돌박이(牛五花,即是肥牛)、안심(牛里肌)等,而全部都可以任食,而且更有生牛肉,以百多元的價錢,真的有點意想不到。

dav

相比香港街市見到,百幾蚊一磅的肥牛,靚不知幾多倍。

這幾種牛肉,相信肥牛香港人見得最多,或者你覺得驚喜程度不大,不過脂肪夠多,首先食一定揀佢,因為可以先迫出肥油,等之後再烤牛肉更少黏鑊。然後分別試食牛肋脊同牛里肌,如果食得生的話,建議只需兩邊大約烤一至兩分鐘就食,食落有肉味,卻有輕量咬勁但不韌,不錯!之後再食大大塊的牛扒,烤香兩邊之後,再剪成小塊輕輕一烤,意想不到的入口即溶,充滿肉汗,個人覺得是多種牛肉中最好食。

至於生牛肉方面,入口冰凍就知剛由雪櫃拎出來,無筋之餘鮮味不錯,只是調味上未必夠足門店做得好。總括來講性價比非常高(你見我影得咁少相,就知我食到忘記影…….),如果有機會一定要去!

무한소

地址:서울 송파구 백제고분로9길 25( 2 號線新川站 4 號出口)

營業時間:星期一至六 13:00 至 24:00 ,星期日休息

語言:韓文

售價:25,000won(兩小時任食)

螢幕快照_2015-11-27_上午12_11_34