仲用自拍神棍自拍? 全自動航拍機 ZERO-TECH Dobby 自拍先叫 in

仲用自拍神棍自拍? 全自動航拍機 ZERO-TECH Dobby 自拍先叫 in

2016-08-13 Off By 金仔

航拍雖然多人玩,但由於操作要有一定程度的技巧,並不是每一個人都識玩。當然業界亦不停簡化操作,好似早前就有一架摺合式的自動人面追蹤航拍機,現身 Kickstarter 。而最近類似的航拍機亦在香港推出,由 ZERO-TECH 生產的 Dobby ,能人面追蹤、手掌起飛、自動影相拍片等功能樣樣齊,不懂玩遙控飛機?一樣玩到。

ZERO-TECH Dobby

iPhone 6 大細

作為一部便攜式的自拍航拍機,最重要當然要方帶攜帶兼易收藏,講明自拍當然要吸引到女用家用,體積大一定不予考慮!而 Dobby 採用可收機翼設計,收埋機翼面積(唔係厚度!)只同 iPhone 6 差不多,重量亦只得 199g ,流動性都算不錯。而重點是不似其他航拍機要自己裝翼,即時一拎出街就用得!而且八成操作按一個掣就得,亦設有全自動的 10 秒自拍功能及目標追蹤功能,零遙控機經驗,都一樣識用。

Dobby
收起機翼,睇落好似尿袋。
ZERO-TECH Dobby
只要一打開機翼,便可用手機遙控飛行。

室內室外都用得

至於 Dobby 另一個賣點是室內室外都用得,而且室內毋需太多操控,都能夠非常穩定飛,全因機底設有超聲波及光流定位系統,可測量飛機與地面的高度,並保持平穩。而在室外,雖然機翼不算大,但亦可承受四級風速。由於採用 Wi-Fi 雙模式連接手機控制,最遠的操控距離有 100 米,作為自拍機,應該夠用有餘。

ZERO-TECH Dobby
機底分別設有光流定位及超聲波定位,室內都能穩定飛行。
Dobby
鏡頭只能手動調校角度。

拍 4K 出 1080p

講到自拍,拍攝能力當然好重要,機前設有一個 1300 萬像素相機,可拍攝 4K 影片,不過輸出只得 1080p 。點解?因為今次拍用 EIS 三軸電子防震功能,會利用 4K 的畫面進行震動修正,所以最後只可以輸出 1080p 影像。而鏡頭焦距為 28mm ,可向上調教 22.5 度及向下調校 90 度,不過只限手動,不能在手機遙控鏡頭角度。

支援 Quick Charge 2.0,就算無電,充 20 分鐘都有八成電。
 Dobby
怕俾機翼打到?亦可另購防撞架。

每次玩 9 分鐘

由於部機要夠輕,所以電池電量不會太高,容量為 970mAh ,最長可提供 9 分鐘飛行時間,老實講並不算長,好在設有快充充電器,以 USB Type-C 連接,亦支援 Quick Charge 2.0 ,可使用尿袋為電池快充,充廿分鐘便有八成電。至於售價方面,為 $2,999 ,算貴?當每個女仔都用自拍神棍自拍,而你可以用航拍機拍到更靚的角度,相信這個價錢立即會變得好抵。

設有人面識別及目標追踨,全自動幫你手自拍。
男朋友想 showoff 自己的操機能力?都可更改為虛擬遙控器模式操控。