Olympus PEN E-PL8 專攻自拍 跳出入門機規格

Olympus PEN E-PL8 專攻自拍 跳出入門機規格

2016-09-20 Off By 金仔

今日 Olympus 開發布會,雖然並非專業細機 OM-D E-M1 Mark II ,而是另一部 PEN E-PL8 。第一時間見到 E-PL 三個英文字,你可能會覺得原來出部入面機,但其實今代 E-PL8 並不入門,相反仲加入好多旗艦機功能入新機之內,加上 180 度反芒自拍功能,可以話是一部多功能又全面的換鏡細機, E-PL8 連 14-42 EZ 套裝定價為 $5,090 ,的確好吸引。

Olympus PEN E-PL8

除了 Olympus PEN E-PL8 ,今次亦同時推出 M.ZUIKO DIGITAL ED 25mm F1.2 PRO (中)及 M.ZUIKO DIGITAL ED 30mm F3.5 Macro 。

機身設計繼續懷舊

作為近年復古機的先導者,今次最新的 E-PL8 外型亦都繼續走復古風,同以後的 E-PL 機款最大不同,是加入不少皮的部分,其中最搶眼就是啡色皮配銀色機身,配埋一身偽文青裝束,簡直襯到絕。至於手感方面,拎上手就知比過往的 E-PL 系列機重,同時亦相當扎實,雖然握位始終不夠突出,但如果一般影相(即時行幾步影一張嗰種),其實都可以接受。

Olympus PEN E-PL8

機頂設有兩個轉盤,而且更加入齒邊,扭起來相當有質感。

全反芒玩自拍

DC 機玩全反芒,換鏡細機都一樣要,而今次 E-PL8 採用多角度的自拍屏幕,可向上 80 度及向下 180 度,亦即是只要向下反屏幕,就可以自拍。不過,自拍機多如繁星, E-PL8 亦不會只得反芒,而是當相機偵測到反芒之後,屏幕上會加入影相鍵及拍片鍵,影相鍵的作用未算最好用(就一就手勢就可以單手按快門),反而拍片鍵就好有用(拍片實體鍵在機背又細粒,反轉部機好難㩒到)。

Olympus PEN E-PL8

低角度

自動製作短片

拍完片,最重要當然是將短片分享上網,想影片更好看,當然要做某程度的剪輯,而今次 E-PL8 亦都加入短片自動剪輯功能,可以將數條長 4 秒(拍片時設定為 4 秒短影片),編輯成為一段短片,而且短片會配埋背景音樂、過場效果,全部都可以在相機內做到。加上 E-PL8 亦內置 Wi-Fi ,可直接將影片傳送到手機,再上載到 Facebook ,想拍到有電影感的影片,都不一定要靠男友出手。

Olympus PEN E-PL8

機側設有 HDMI 輸出插頭,可直接接駁電視。

功能並不入門

雖然過往 E-PL 的定位是入門機,但其實 E-PL8 的設計並不入門,首先內置 1605 萬像素 4/3 Live MOS 感光元件,配合專門為自拍而設的三軸防手震。設定介面亦改用 PEN 系列的專業界面,提供更多的相機設定,而非過往「簡單就是美」。另外,亦將間隔攝影功能由上一代的 99 張,變成最多 999 張。連拍方面則最高可達 8.5fps ,配合埋 FAST AF 對焦功能,以上規格足以達到中階半專業級。

Olympus PEN E-PL8

最多可以達到 8fps 連拍,作為一部入門至中階相機,非常夠用。

Olympus PEN E-PL8

提高間隔拍攝的張數,用來影星軌最適合。

總結:初學者之選

雖然現時手機影相相當盛行,但其實仍然有不少人想學影相,對於初學者,一部機不單止要夠用,而是更應該有更多日後可使用的功能存在,學兩、三年都仍然夠用先算合格。更重要是外型要吸引到初學者興趣(十個初學者九個都不會聽你講功能),價錢又太貴,綜合以上觀點 E-PL8 具有一定吸引力。

E-PL8 試相

M.ZUIKO DIGITAL ED 30mm F3.5 Macro 試相

M.ZUIKO DIGITAL ED 25mm F1.2 PRO 試相(最大光圈)

Z01 z02 Z03Z04 Z05 Z06Z07 Z08 Z09