手機遊戲手掣食雞打機好過癮?  淘寳百五人仔手遊手掣實測

手機遊戲手掣食雞打機好過癮? 淘寳百五人仔手遊手掣實測

2018-07-24 Off By 金仔

不少人都會用手機打機,但如果只是玩智力遊戲,當然問題不大,但如果是玩動作 RPG 遊戲,隨時按到手指痛,進階玩家會將手機遊戲放到電腦上用手掣玩,但完全失去玩手遊的意義!其實玩時都有不少專為手機而設的手機手掣出現,貴價的外國貨、國產貨都有,但作為精打細算的人,識玩當然搵淘寳!今次就實測這個名為 Mocute 的遊戲手掣,盛惠 126 人仔(約 HK$149 ),究竟表現如何?下面慢慢講!

老實講,個包裝真係無咩事,仲要幾靚仔…..

其實要揀遊戲手掣,話易不易,話難易不難,不過坊間有多個手機手掣可以揀,為什麼要揀這個?要揀當然是有要點,主要有三個,第一是支援自定義按鍵,因為現時不少國產的手機手掣,都只能支援由生產手掣方經更改過的遊戲,如果想玩自己鍾意的遊戲但又無所謂的特製版遊戲,便有機會無法用手掣玩到。不過,自定義按鍵功能能亦非萬能,不少舊款手機手掣都必需將手機Root或越獄才可,而新款手掣「聲稱」可以解決這個問題,又仲要不需要 Root 機同越獄…..

兩個磨菇仔送嘅,啱唔啱用就另計

配件就係一條充電線,加埋一張紙過的說明書

第二,就是支架,買得手機手掣,當然是想拎出街用之餘,最好又夠實淨,而國產手掣好多都以手機支架+手掣本體設計,但這種設計都有兩種,一種是支援可收入手掣內,另一種則是將支架與手掣分離。首選是第一種,因為想打只要打開支架就用得,毋需安裝,不過安全性當然會低少少(下面會詳細講)。第三當然是價錢,其實不少遊戲手掣都有在香港賣,但價錢就差好遠……

90度模式,都算企得穏

一拉底咗,即跌

既然講完要求,這個 Mocute 遊戲手掣在「網站頁面」上是符合以上三點先入手,老實講,百幾蚊買個手掣,如果玩到又真係幾爽。先打開盒,入面的包裝相當簡單,只有三種物件,手掣、充電線同說明書,不過賣方都好體貼,送兩個「磨菇」防滑套,雖然並不值錢,但最重要夠方便好用。

最重要是支架,不過老實講,雖然都算夾得幾實,但用料唔算好,拉得多都驚出事。

至於手機手掣本身,除了支援 iOS 及 Android 之外,亦支援電腦,當然首先你的電腦要有藍牙先用得。不過,打開說明事睇,嘩,點解佢入面嗰四個模式,無一個係自定義按鍵!!(中伏鳥!)手掣所提供的四個模式,分別是自動模式、小雞蘋果/android MTK 模式、NEW Game模式及 iCade 模式。睇完個名都唔知點解?慢慢講你知。

機背有 QR Code ,可以即時掃出專用網站連結

自動模式固名思意即是全自動設定,如果你玩的遊戲,支援 Game Pad 功能的,就可以連接得到使用。至於小雞蘋果/android MTK 模式,前者是專為 iPhone 用家而設,用家可以下載名為開心小雞模擬器,入面可下載不同模擬器遊戲,全部都對應手掣玩,而模擬的對像,包括 PSP 、 NDS 、 PS 、 DC 等舊款遊戲機,亦會有少量新手遊(植入手掣對應功能)可供下載。而後者的 android MTK 模式,是專為舊款使用 MTK 處理器而無法對應手掣的用家而設。

在這個網站可以搵到所需的App下載

而 NEW Game模式,其實亦同小雞模式有點相似,用家可以透過另一個「方塊遊戲」 App ,下載一些修改過的手遊(同樣都是內置手掣對應功能),之後用家就可以用手掣來玩。最後的 iCade 模式,其實就是在 App Store 或 Google Play 下載支援 iCade 功能的遊戲,都可以對應手掣,好彩你玩緊個 Game 對應,就可以用。

不過,全部app都係要自行再入設定做認証…..

四個模式入面,都無提過自訂虛擬按鍵呢個功能,明顯就無啦,不過,既然手掣到手,又話有個 NEW Game模式,即係話玩緊大陸 Game 的話,或者可以摶一摶,下載個遊戲過檔,都可能可以用到手掣玩喎!剛好又有隻「 崩壞 3rd 」玩緊,就試下!

Game係幾多嘅,但有幾多個玩到,又有幾多個要你用大陸電話登陸,真係唔敢講囉

其實在「方塊遊戲」之內,都有幾多遊戲可以揀,其中不少仲幾新,而這個「 崩壞 3rd 」都有份,另外再下載埋隻「 龍之谷 」試一試。結果,迎來的是慢速下載速度!其亀速的下載,如果下載過 1GB 的遊戲,應該都要有等足一日的心理準備,無計,始終是由 App 本身的伺服器下載,點會快先。

下載速度都係「快」到呢…..

進入加入手掣支援功能的遊戲,可以經左上角進行設定。

等了又等,終於兩個 Game 都下載完,終於有得試玩,第一時間當然是在「 崩壞 3rd 」(方塊版)登入賬戶先,咪住,點解登入不能!理由好簡單,佢嗰個是大陸版,自然是用大陸伺服器,我在香港玩,用港台伺服器,梗係登陸不到,連 Facebook 選項都無,要入電話都要大陸電話,想開新賬戶玩都無可能,已經唔使諗。試埋另一隻「 龍之谷 」,一打開個 Game ,Sorry ,系統話要更新最新版本,一彈就去咗 App Store ,更新完之後?什麼手掣對應功能都同你講 Bye Bye ,用返屏幕玩。

或者對於愛搵模擬器的用家,應該會比較啱囉

由以上兩個 Game 都應該了解到個手掣有幾咁有用,玩時暫時唯一用途,就是完美對應模擬器,可以玩舊 Game ,其他好似拎出街用好唔好用,連接穏唔穏定,講嚟都浪費時間。不過,值得一提的是,以上測試都是用 iPhone 8 試,之後連去 Android 諗住有無一線生機,點知穏定度低到爆,經常斷線,好彩百幾蚊,否則應該會用刀仔拮大脾!