網絡安全從業員超搶手 留人秘訣靠呢6招!

網絡安全從業員超搶手 留人秘訣靠呢6招!

網絡攻擊愈來愈嚴重,為咗減低被攻擊風險,唔少企業都會爭住請人。 細公司無資源? 咁咪幫襯網絡安全託管服務供應商(MSSP)囉,所以而家呢類服務嘅供應量大增,背後咪又係要網絡安全專才? 就喺咁嘅情況之下,網絡安全從業員近年被睇高一線,只要真係識得落手落腳做,或考到一啲 CISSP 之類嘅國際認證資格,都唔使擔心會無人請,所以業內職位流轉率高、人手亦非常短缺,難得請到個幫得手嘅人返嚟,要點先可以留住佢個心? 不妨參考以下 留人秘訣 ,雖然礙於各種原因,企業管理者未必樣樣都 offer 到,但起碼知道啲人跳槽嘅原因先丫。

開聲叫員工放假

網絡安全工作好多時做會做到天昏地暗,令員工未必好意思主動請假。 管理者應設立一個強制放假政策,事關呢個世上唔會無咗邊個唔得, 如果真係因為一個員工放假而出事, 咁好明顯係制度本身存在漏洞。 講真員工俾埋條命你都唔係咁好, 所以不妨同條 team 傾下, 落實強制放假政策俾員工 break 一 break, 返嚟先再打仗。

減少加班

調查顯示 47% 網絡安全從業員都會超時工作, 就算公司有補水都好(仲要通常都無), 員工可能都係傾向休息或陪親友。 管理者應該實行準時放工政策, 為每位員工編排好輪班而且要平等安排, 咁就可以提升員工嘅好感度啦。

無事要慶祝

喺網絡安全世界, 無消息先係最好嘅消息。 管理者唔應該等到解決咗事故先同手下慶祝, 反而可以確立「零事故」政策, 只要喺一定時間內公司無出安全事故, 就可以拉大隊去玩吓或發放獎金, 等員工平時都積極啲搵潛在漏洞。

為員工著想

除咗準時返放工之外, 管理者應該了解吓網絡安全從業員嘅想法, 例如想喺公司得到啲乜嘢、想參與邊啲自己認為有意義嘅工作, 然後盡可能幫佢哋安排。 因為只要佢哋有興趣, 做起事上嚟效率都會特別高。 而且上級嘅聆聽亦可增加下屬好感度。

落實遙距工作

經過新冠疫情後, 唔少人先發現其實在家工作並非無可能, 所以唔少員工都希望公司可以採用彈性在家工作模式, 而事實上 Microsoft 嘅調查亦發現員工喺屋企工作, 生產力反而提高。 管理者應該考慮採用彈性 WFH 模式, 尤其係而家好多應用服務已經上晒雲, IT 員工未必需要返公司做嘢, 彈性返工就可以提振士氣。

留人秘訣參考價值

或者有人會話人手已經唔夠, 仲點提供上面呢啲政策? 係嘅, 不過話明而家出面四圍搶人, 如果管理者認為請個新人返嚟, 仲有時間慢慢培訓或了解佢嘅工作能力, 咁就可以當成廢話。 其實俾著你係下屬, 如果返工唔開心, 就算其他 offer 差唔多都可能會走啦。

詳情:https://ibm.co/3Cum3G6