貪平誤墮鳩嗚陷阱 受害者寧做金錢驢隸犯法洗黑錢

貪平誤墮鳩嗚陷阱 受害者寧做金錢驢隸犯法洗黑錢

雖然近排國際刑警連環將 REvil、GandCrab 等勒索軟件集團成員緝捕歸案,相關消息搶盡全球目光,不過,勒索軟件針對嘅始終係企業,而對於尋常百姓嚟講,呢單「金錢驢隸」(Money Mules)嘅網絡騙案可能更應該要知。

事緣係咁,西班牙警方早兩日成功喺境內多個地方將 45 個網上詐騙集團嘅嫌疑犯緝捕歸案,呢批嫌疑犯估計已經成功呃咗 200 個人及合共騙取 150 萬歐元。計落每個受害者都係唔見咗七千幾歐元,好似濕碎啲喎!但就係因為錢唔算多,大家先至容易上當。

網購變金錢驢隸

呢種詐騙手法其實唔算複雜,首先犯罪集團設立咗 20 多個虛假購買網站,以超平價電子產品吸引受害者購買,不過受害者當然唔會得到產品,反而會收到犯罪集團嘅聯絡,指佢哋已經受騙。如果想攞返啲錢,就係要成為佢哋嘅幫手,即係要受害者去銀行開個乾淨嘅戶口同埋申請信用卡,之後將相關文件同信用卡寄去非洲一個叫做貝南(Benin)嘅國家,供犯罪集團用嚟洗黑錢,而受害者就會獲得分佣,唔單只攞得返自己嘅錢,仲可以額外賺取使費。

睇到呢度,大家應該都會覺得好奇怪,就算犯罪集團無講明會用個戶口嚟做乜,受害者都無理由咁蠢將自己個戶口借俾人啩?不過呢啲真係千古奇案嚟,小編一樣唔了解自己究竟睇咗啲乜!不過亦有部分受害個案表示,如果拒絕對方要求,就有人試過收到死亡恐嚇,亦有部分個案因為見到對方展示嘅文件,而相信對方係正當嘅合法貸款人,所以先會答應合作。

雖然成件事都好似好唔合理,但睇報導都發現唔少人中咗招啦,唔通佢哋對金錢嘅態度,就好似姜B首歌一樣,係「幪著眼說愛你」?

詳情:https://bit.ly/3D2LGxW