停一停諗一諗 遺失iPhone都要守住Apple ID

遺失iPhone 或其他 Apple 裝置,機主第一時間都會登入 iCloud 嘅 Find my iPhone 功能,搜尋部機現時或最後 online 位置,同埋喺 Lost Mode 輸入自己嘅聯絡電話及留下其他聯絡訊息,盡最後努力睇吓會唔會咁好彩遇著好心人執到部機。就算遇著壞人,機主都可以遙距鎖死部機,令賊人唔可以還原部機出售。

不過,有賊人就利用呢個聯絡渠道同埋機主急住攞返部機嘅心理,進一步呃埋機主嘅 Apple ID,咁到時就唔單只係無咗部機,仲連個儲存咗好多你個人資訊嘅帳戶都俾人睇晒,所以如果真係唔好彩遺失咗部 iPhone 或其他裝置,都唔好咁易上當!

講咗咁耐,到底賊人係點呃機主?一齊嚟睇睇印度用戶 Vedant Khanduja 嘅真實慘劇。話說 Khanduja 有日唔見咗部 iPhone 12,於是佢就用 Find My 功能嚟追蹤及鎖死部失機。幾日後 Find My 功能顯示部機已經 offline,Khanduja 相信部機已經唔會再搵得返。但就喺呢個時候,佢突然收到 SMS 訊息,內容係部機已經搵返,但就要佢輸入 Apple ID 同密碼登入 iCloud 帳戶處理。Khanduja 一時心急,諗都無諗就點擊 SMS 嘅連結同埋輸入帳戶資料,點知轉個頭就收到另一個訊息,話佢嘅 Apple ID 已經喺另一部電腦被登入,賊人唔單只解除咗部機嘅 Lost Mode,仲改埋佢嘅 Apple ID 密碼。去到呢個地步,Khanduja 部 iPhone 就正正式式變成「失物」,仲要諗方法攞返個帳戶,呢鋪真係慘仔……

遺失iPhone免中計

唔想再被傷害?以及俾對方解鎖埋部手機?首先大家喺遺失 iPhone 後,收到呢啲訊息都唔好直接點擊任何連結,最理想做法自然係手動輸入 iCloud 網址,喺官方網站登入帳戶檢查。另外,大家亦應該去 Apple ID 設定頁面,喺「登入與安全」選擇啟用雙重認證服務,就算賊人呃咗你嘅登入資料,欠缺 2FA 確認碼都登入唔到,咁樣就安全得多啦!

詳情:https://bit.ly/3c8VgDT