【手動傳】與時並進 黑客用 Omicron釣魚電郵呃英國市民

【手動傳】與時並進 黑客用 Omicron釣魚電郵呃英國市民

變種新冠病毒 Omicron 一出,全球抗疫形勢即刻變得緊張,事關專家話呢隻變種病毒嘅傳染力大升呢,而且亦唔知道已接種嘅疫苗對佢有無效,雖然未必每個人都會擔心新病毒會社區大爆發,但就肯定會關注會唔會令到自己出唔到街。網絡罪犯睇準呢個機會,秒速改用 Omicron釣魚電郵以提升詐騙成功率。

好似好多港人移民咗去嘅英國,罪犯就假扮成英國國家醫療保健服務系統(National Health Service, NHS),向英國市民發出一封「申請 Omicron 病毒測試」嘅釣魚電郵。電郵內容話有鑑於新變種嘅傳播速度快,而且可感染已接種人士,因為 NHS 已製作出新嘅測試工具,可讓市民免費申請。信中仲話如果拒絕接受測試將有可能被隔離,喺心理上脅迫收件者盡快㩒掣申請。

如果收件者信以為真,㩒掣後就會被帶到一個虛假嘅 NHS 申請網頁,要求輸入姓名、出生日期、地址、手提電話號碼及電郵地址等資料。系統仲要求收取 1.24 英磅測試報告郵寄費用,既可以增加真實感,亦可以呃埋對方嘅信用卡資料,呢招認真絕!

舉報 Omicron釣魚電郵盡市民責任

如果各位有親友已經移民咗去英國,不妨提提佢哋小心呢類詐騙電郵,順便盡吓公民責任,將可疑電郵匯報去「report@phishing.gov.uk」,咁就可以減少其他人中招風險。

詳情:https://bit.ly/3EmuhAX