小童智能手表漏洞處處 貪平使用闔家唔平安

小童智能手表漏洞處處 貪平使用闔家唔平安

好多家長為咗子女安全,都會買隻小童智能手表俾佢哋,定家長可以透過專用手機 app 掌握佢哋嘅位置。不過, Dr. Web 網絡安全專家測試過市面四款 Android 系統小童 smart watches 後,就發現全部都有安全問題,唔單只可以俾黑客入侵家長部手機,黑客仲可以隨時掌握子女實時位置,變相令子女更加危險!小編戴定頭盔先,呢四款智能醒手表都係俄羅斯出品,香港未必買到,但你估世界上淨係得俄仔先識專登整啲後門或唔提供安全設定俾啲產品咩?係咪都有參考價值先。

四款俄製小童智能手表高風險

今次安全專家測試嘅四款產品分別係 Elari Kidphone 4G、Wokka LokkaQ50、Elari FixiTime Lite 及 Smart Baby Watch Q19,而最大問題嘅係頭兩款。專家話 Elari Kidphone 4G 及專用 app 內藏三個隱藏模組,會自動傳送位置資料及接收指令,因此有心人可以喺用戶嘅 Android 手機上下載及安裝惡意軟件,同時盜取用戶個人私隱。而只售約 120 港元嘅 Wokka Lokka Q50 本身係採用咗 123456呢個咁強嘅密碼,而且傳送嘅資料亦無加密,因此黑客可以發動中間人攻擊,主動要求取得定位位置及手機配置資料,仲可以打開手表嘅收音功能,聽吓子女嘅對話添。

其實呢幾隻智能手表都係幾百蚊貨仔有交易,好多家長都會貪平,以為可以買個安心,但實情就令自己同子女都曝露喺危險之中。係咪真係平平哋買嚟一試無妨?真係要自己衡量喇。

詳情:https://bit.ly/3d480vZ