Microsoft打擊老翻Office新招 全線產品半價行正路係時候

Microsoft打擊老翻Office新招 全線產品半價行正路係時候

用緊盜版 Microsoft Office 嘅用戶,最近喺打開老翻Office 各種應用軟件嘅時候會收到彈出式通知,內容係系統偵測到你用緊老翻,不過就唔係有任何法律起訴行動,而係提供一個半價優惠,呼籲用戶快啲加入正版行列,唔知大家有無諗住俾錢呢?

老翻Office升級優惠

外國資訊網站 Ghacks 最新報導,指有盜版 Office 用戶最近打開軟件時,發現頂部出現彈出式通知,指系統已偵測到用緊嘅係老翻。當㩒開通知嚟睇,通知內容首先列出使用盜版嘅壞處,包括曝露於病毒及惡意軟件嘅攻擊之下、檔案損毁及數據損失,以及無法獲取重要嘅更新檔案等。版面同時提供 50% 折扣優惠連結,Microsoft 365 Personal 用戶可以 69.99美元訂閱一年服務,兼獲得 1TB 雲端儲存空間,可供 2 至 6 個用戶使用嘅 Microsoft 365 Family 版則可以 99.99 美元訂閱一年服務,雲端儲存空間亦有 6TB。

通過今次盜版升級優惠行動,相信 Microsoft 可以增加大量付費訂閱用戶。不過,就算諗住升級裝返正版,過程都未必順利,而 Microsoft 方面已同時設立咗一個支援網頁,提供各種升級 Office 嘅疑難解決方法,包括用戶有可能需要完成解除盜版安裝,然後才重新下載及安裝正版 Office 套裝。

詳情:https://bit.ly/3IknPNv