法國政府跟隊 Clearview AI被要求刪除100億人臉特徵

法國政府跟隊 Clearview AI被要求刪除100億人臉特徵

美國人臉辨識(face recognition)科技公司  Clearview AI 又再被要求刪除數據庫資料,繼美國部分州分、澳洲後,今次輪到法國嘅國家訊息與自由委員會(CNIL)發聲,官方指由於對方以人工智能方式,採集嘅人臉特徵數據嘅手法違反咗歐盟一般數據保護法(GDPR),因此要求對方刪除從網絡收集得來嘅數據資料,以及停止繼續使用其人臉辨識技術,據估計資料庫收集嘅人臉數據高達 100 億人次,公司前景相信會進一步受規範。

Clearview AI人臉辦識犯眾憎

Clearview AI嘅技術及服務之所以受到關注,係因為公司採集人臉特徵嘅方法非常有爭議性。佢嘅系統會自動於社交平台收集用戶上載嘅相片及影片到資料庫,從中記錄出現嘅人臉數據,採集得來嘅資料,會為不同國家嘅執法機關及私人企業提供人臉配對服務,因此絕對違反各社交平台保障用戶私隱嘅政策,而 YouTube、Facebook、twitter已先後發信要求對方終止採集社交平台上嘅相片及影像。不過,由於 Clearview AI 嘅總部設於美國,因此最終會否因應澳洲及法國要求刪除數據庫,現時仍是未知之數。

近年人臉辨識技術喺社會上嘅爭議不斷,但普遍認為在收集數據上必須加強監管。由於發展相關技術嘅前景未明朗,因此不少科技公司都暫停繼續使用人臉辨識技術,例如 Facebook 會宣布會停止使用,日後用戶上載相片或影片後不會再獲得自動標籤人物服務;Amazon 亦宣布會無限期停止向美國執法部門提供相關技術,以回應美國多個城市對生物特徵嘅私隱保護(BIPA)要求。

可能大家覺得同自己無乜關係,但其實好多人喺不知不覺間都將自己嘅人臉特徵授權他人使用,最常見嘅例子包括換臉app,雖然將自己或朋友嘅樣套上經典電影或情景上好似好好玩,但背後其實代表你同意對方可以使用你或你朋友嘅人臉特徵,乜真係咁值得咩?

詳情:https://bit.ly/3y6YDW7