綁錯人秒速免費解鎖 勒索軟件集團AvosLocker死要面唔認驚

綁錯人秒速免費解鎖 勒索軟件集團AvosLocker死要面唔認驚

中招就係中招,除非你係警察!中咗勒索軟件,雖然話唔交贖金就無可能攞得返啲被加密嘅數據,但凡事總有例外,就好似勒索軟件集團 AvosLocker 咁,當發現受害者係美國警方後,轉過頭即刻道晒歉兼無條件將解鎖工具交俾對方,差在未補多句「誤會嚟啫誤會嚟啫」…….

先嚟解構一下今次事件,而家勒索軟件集團好多時都會同其他人合作,自己出工具同埋負責收贖金,partner 就提供入侵目標對象嘅方法。呢種合作模式嘅好處係勒索軟件唔使靠自己去入侵咁嘥時間,因為合夥人可能已經有方法入侵,例如擁有目標企業嘅公司帳戶、已掌握公司系統內存在嘅漏洞等,而對合夥人嚟講,佢亦唔使編寫勒索軟件同埋出面收錢,對雙方嚟講真係稱得上 Win Win。

AvosLocker拒認恐慌

不過呢種合作模式亦會出現問題,例如勒索軟件集團本身可能會避開高風險目標,例如政府機構、執法部門、涉及民生嘅機構如電力、供水公司,因為一旦激嬲該國政府,好可能會被迎頭打擊,年中喺美國發生嘅多宗大案,就導致涉事嘅勒索軟件集團如 DarkSideREvil 等相繼被搗破或被消失。不過站於合夥人嚟講,既然大部分風險都係集團揹起,佢哋梗係唔會對上述機構留手啦,所以今次 AvosLocker 集團就聲稱係合夥人私自出手,實情自己就唔會攻擊執法機關,於是就即刻提供解鎖工具俾對方,你話唔係淆底就假。

不過,AvosLocker 方面就話唔關事,只係回應話今次決定係因為納稅人啲錢唔易袋,換言之即係好大機會有手尾,但佢哋仍然不失霸氣咁話由於集團身處嘅國家唔會管理勒索軟件嘅事,所以根本無嘢好驚……如果真係唔驚,點會有錢都唔袋?

詳情:https://bit.ly/3qxBd8Y