相信唔少人都有用，甚至已經習慣咗用智能手機、手表嘅非接觸式（contactless）付費系統，只要將信用卡或 debit 卡加入相關裝置，出街就幾乎可以唔使帶銀包，的確係吸引嘅。不過，詐騙集團亦睇中咗呢項咁方便嘅付費服務，有記者就喺詐騙集團開設嘅 Telegram 群組內，見到有愈嚟愈多詐騙組織出售用嚟盜取信用卡 SMS 驗證碼嘅機械人，騙徒仲示範將盜用嘅信用卡加入 Apple Pay、Google Pay 等智能手機付費工具後，用佢哋去大量購買現金儲值卡添。
成個詐騙過程其實唔複雜，就算你無上面提及嘅機械人，都一樣可以靠你自己做到。今次就以 Apple Pay 為例，首先，騙徒必須手頭上持有受害者嘅信用卡資料，例如姓名、信用卡號碼、卡身驗證碼等等，同時亦要有受害者嘅電話號碼。當集齊以上資料，騙徒就可以喺 Apple Pay 上手動加入相關信用卡，同時假扮成信用卡公司、Apple Pay 員工……總之可以令受害者相信身份，向對方打出電話，訛稱為咗確認對方嘅帳戶無被盜用，必須即時向對方發出驗證碼及要對方讀出驗證，而喺呢個時間，騙徒就可以喺 Apple Pay 上指示用 SMS 驗證信用卡資料，於是當受害者讀出驗證碼，騙徒就可以順利將信用卡加入 iPhone，兼且極速拎去消費，咁就可以成功用受害者嘅錢買現金券喇。
雖然 Apple Pay、Google Pay 本身都有啲人工智能驗證技術，去通知卡主懷疑有可疑活動，不過首先都要卡主將卡加入手機支付系統先得，而雙方喺回應傳媒查詢時，亦強調佢哋只係提供付費渠道，至於阻止盜用信用卡嘅責任就全在發卡公司。而作為一般市民大眾，最緊要係唔好隨便信人，以任何形式交出帳戶嘅SMS 驗證碼，不過如果手機已被安裝截取短訊嘅惡意軟件，咁就真係幫你唔到。
