跌咗唔使搵? 49.99 美元買 iPhone 破解術

跌咗唔使搵? 49.99 美元買 iPhone 破解術

唔少人都話就算 iPhone 跌咗,都有好大機會搵得返,其中一個原因係只要遙控鎖機(Activation Lock),對方就算執到部機都無用,所以會寧願聯絡物主,希望收返幾百蚊茶錢。不過情況有變喇,一個叫做 checkm8.info 嘅集團就喺網上出售破解 iPhone 工具,只要用 49.99 美元買返嚟安裝,再連接已被鎖死嘅 iPhone,好快就會令部機回復原廠設定,等新機主可以喺自由市場放售。

Checkm8.info 方面拒絕承認軟件會助長偷機,話計劃有助修復電子產品,節約資源、解決電子垃圾及減少對環境嘅破壞。更厚顏無恥嘅係,check8m.info 用嘅破解方法係來自專門研究 iPhone 越獄嘅 checkm8 組織開發者 Axi0Mx,佢喺 2019 年公開咗 Checkra1n 漏洞,當事人就話對事件感到非常無耐。

喺 checkm8.info 嘅網站上,就示範咗破解嘅過程。首先用戶要下載及安裝破解軟件,之後再連接上要破解嘅 iPhone,程序就會自動執行,但過程中用戶必須繳付 49.99美元使用費。checkm8.info 回覆傳媒查詢時表示,佢哋一個月大約賣到 30 至 150 個使用權,即係至少賺到萬幾蚊港幣,話多唔話話少唔少。值得留意係呢款破解工具同以色列破解服務供應商Cellebrite 有好大唔同,因為前者會將 iPhone 還原至原廠設定,入面所有資料都唔會留低,而 Cellebrite 就純粹係破解開機驗證,所以先吸引到極權政府幫襯。不過,呢種破解方法都唔係所有 iPhone 通行,因為可以用嚟破解嘅漏洞只存在喺 iOS 12 至 14.8.1,而已經升咗上更新版本嘅 iPhone 都用唔著喇。

詳情:https://bit.ly/3mY0bgc