Android銀行木馬軟件 BRATA 最近改進咗入侵技術，進化成一款可持續潛伏於裝置上嘅 APT（Advanced PersistentThreat）。發現呢個新變種嘅Cleafy 研究員話，新 BRATA 雖然主要都係通過 SMS 訊息散播，誘騙歐洲地區收訊者點擊內裏嘅連結，進入虛假銀行網站後下載及安裝首階段嘅惡意軟件，不過，新攻擊會讀取埋目標人士嘅 GPS 地理位置，同時會用唔同方法獲取手機使用權限，令BRATA 可以暗中執行第二階段嘅入侵流程，減少被安全工具發現嘅風險，然後持續潛伏嘅手機內，截取受害者嘅SMS 訊息，例如利用經 SMS 接收嘅額外確認碼搶劫受害者嘅銀行帳戶。
其實 BRATA 之所以咁出名，係因為佢以前嘅行為非常惡劣，專家話喺上年BRATA 加入咗刪除手機資料功能，只要佢一被安全軟件發現，BRATA 就會即刻執行還原手機程序，消滅入侵痕跡，搞到受害者非常麻煩。現時BRATA 主要作案地區係歐洲，英國亦係其中一個熱門攻擊地點，如果你已移英生活，又或有親友剛啱移咗民過去，就要小心提防SMS 訊息，有乜事都係自己打返去銀行查詢啦。
