Google 喺今年 4月宣布會推出 Data Safety 應用軟件權限應用資料計劃，取代現時喺 Google Play 商店內嘅 app permissions list。雖然兩個功能都係俾 Android 用戶喺下載 app 之前睇清楚開發商會攞乜嘢手機權限，覺得可以接受先安裝，不過暫時轉用Data Safety 後嘅用戶反應真係麻麻，不如又講吓到底兩者有乜唔同？
Data Safety 同 app permissions list 最大嘅分別，係前者會由開發商自己提交，後者則係 Google 喺審查軟件同掃描程式碼時所發現出嚟，因此 Data Safety 好視乎開發商嘅誠實程度，但後者亦未必贏晒，因為 Google 都多次對具備惡意功能嘅 Android app 走漏眼，導致軟件可以上架感染用戶。
雖然而家喺 Play Store 上仲有好多軟件例如 WhatsApp、Facebook 等仍未更新 Data Safety 內容，但Google 方面已強制開發商喺 7月 20 日必須完成，所以未來兩日相信用戶都可以睇到相關內容。有業內人士就話，新舊系統其實各有好處，DataSafety 交由開發商撰寫權限取用詳情，例如攞咗啲乜嘢權限、取用原因等，呢啲喺舊制度下未必有咁詳細描述；但太詳細嘅內容亦有唔好處，因為開發商有可能特登寫幾千字去撰寫內容，令大部分貪方便嘅用戶放棄閱讀，直接授權安裝，正如平常大部分人都唔會去睇清楚入會條款一樣。至於到時科技龍頭公司嘅 app 資訊有幾「詳細」，Android 用戶過兩日不妨去 Play Store 鑑賞一下，咁就好易睇得出有邊間公司係全心為用戶著想。
