識者生存 嚴防3種 WhatsApp 詐騙大法

識者生存 嚴防3種 WhatsApp 詐騙大法

網絡安全公司Cygenta早排出咗份報告,歸納咗三種同 WhatsApp 有關嘅網絡攻擊及騙案。雖然唔係香港人成日收到嘅投資、筍工詐騙訊息,但至少都得個知字丫。

熱門話題

騙徒經常利用時事性新聞去吸引目標人士關注,例如早前英女王逝世,騙徒便利用網上悼念為題,吸引未能親自到現場排隊弔唁人士上當,以自己嘅 Microsoft 帳戶登入詐騙網站。而港人最常遇到嘅相信係聲稱來自衛生署嘅通知,指收訊者曾與新冠疫情確診者有緊密接觸,要對方登入網站提交資料。另外觸犯國安法亦係騙徒常用方式,早前就有長者因而被騙去畢生積蓄。

特別體驗

WhatsApp 嘅傳訊功能很多時都落後其他即時通訊軟件,例如訊息自動銷毁功能就不及 Signal 等完善,因此經常有傳 Meta 正為 WhatsApp 推出測試版,又或有騙徒利用 Facebook 廣告或經 WhatsApp 推介特別版 WhatsApp,聲稱有特別功能如收復銷毁訊息、自己隱藏上網資料嘅情況下依然可查看對方有無睇過訊息,令目標人士上當下載使用,最終安裝的卻是惡意檔案,又或導致 WhatsApp 帳戶被奪。

騙取驗證碼

為安全起見,唔少人都為 WhatsApp 開啟多重因素驗證,要透過接收電郵或短訊驗證碼先可以登入帳戶。騙徒其中一種方法係首先與目標 WhatsApp 用戶扮熟,時機成熟就會用對方嘅電話號碼重新登入帳戶,同時間就經 WhatsApp 同目標講唔小心發錯咗個驗證碼去佢嘅號碼,要求佢提供驗證碼,結果帳戶就咁樣無咗。事件亦未完結,因為騙徒會走住個勢,利用新奪取帳戶嘅聯絡人資料,假扮成受害者聯絡佢嘅親友,再用同一方法繼續搶帳戶,又或聲稱等錢使或要買點數卡,由於係熟人傳送嘅訊息,所以有唔少人會上當。雖然呢種方法只可以用來賺快錢,但令親友受騙都好難解釋,過意唔去丫。

詳情:https://bit.ly/3UD4lcS