勒索同詐騙喺本質上係有好大分別，前者嘅情況係罪犯的確有受害者嘅痛腳喺手，但詐騙呢？ 根本就係純粹靠嚇，不過，原來毋須搞得太複雜，因為得把口講，都真係可以呃到錢，你睇經常發生咁多電話騙案，就知呢招真係 work。電郵騙案其實係用相同手法，好似最近有罪犯就濫發大量勒索信俾唔同對象，由於收到信嘅人太多，包括網絡安全專家同傳奇黑客，所以估計罪犯本身無特定攻擊對象，純粹以多取勝。
電郵嘅內容大致係，騙徒話因為發現到收件者嘅電腦系統存在已知漏洞，所以已成功入侵收件者嘅電腦及伺服器，暗中攞走晒機密資料同客戶數據，如果唔想佢哋公開事件，以及逐一通知對方嘅客戶，就要即刻將價值 2500 美元嘅 bitcoin 存入指定錢包。經過專家分析，其實呢封電郵並無任何實際證明，而且內容亦唔完全適用於收件者嘅背景上，所以斷定根本係靠嚇。之不過，專家檢查騙徒留低嘅錢包位址，就發現已經有人俾咗贖金，呃錢真係簡單過投資陷阱，起碼唔使搵 KOL 搭個棚先丫。專家話騙徒最主要係利用收件者嘅恐慌情緒，逼佢哋喺短時間內做決定，其實如果坐低唞啖氣飲返杯茶，可能就會意識到係騙局嚟喇。
