犯罪集團出app賣禁藥毒品 取貨位置精準減低被捕風險

與時並進、抓緊時機真係好緊要,網絡犯罪集團自從喺一個專門售賣毒品禁藥嘅地下討論區 Hydra Market 被封後,開始自行開發 Android app 繼續賣毒,網絡安全公司 Resecurity 發現喺上年第三季開始,至少有 7 個犯罪集團利用自家 app 同顧客溝通,安排送貨細節。 App 嘅功能包括網上落單,並可向顧客發送取貨地理位置,仲可以寫埋將啲毒品禁藥收埋嘅地底幾深,唔怕對方搵唔到收埋喺邊。由於係用 App 落單交易,數據掌握喺自己手上,只要唔俾執法機關攞到呢啲資料,就可避免被追蹤及逮捕。

Resecurity網絡安全研究員喺報告內指出,自從 Hydra Market 喺上年 4 月被停業,原本利用討論區交易嘅犯罪集團霎時間變咗無門路,雖然都有其他討論區可使用,但因為缺乏信用,如果交易資料留晒喺平台,一旦對方又被執法機關封檔,就有好大機會受牽連,因此發現有犯罪集團開始開發 Android app 繼續經營。而且因為市場缺乏具公信力嘅交易平台,所以大家都喺度鬥搶生意。專家話 Hydra Market 有1.9 萬個賣家,喺全球亦有 1700 萬買家,個餅非常大。不過,專家發現咁多款 Android app 都係用緊一個叫做 M-Club CMS 引擎去開發 apk,所以懷疑背後好大機會都係採購緊同一個服務,而專家亦估計由於呢類軟件即服務嘅提供者將會更多,所以相信參與嘅犯罪集團會愈來愈多,唔知點照顧 iOS 用戶呢?

詳情:https://bit.ly/3CDyrpw