現今的智能手機功能多，部份功能間中「炒車」，相信用家都習以為常，但如果連睇 YouTube 都出事，你又接唔接受到？最近在 Reddit 上便有用家表示當他使用 Google Pixel 7 Pro 睇 YouTube 時，部機竟然會自動重啟，而且仲要是睇《異形》，難道是有鬼？
根據Reddit 用戶「OGPixel」在2 月 26 日於Reddit的GooglePixel版發文指，當他使用 Pixel 7 Pro 手機觀看 4K HDR 版《異形》（Alien）電影的剪輯片段時，部手機便立即重新開機，而且萬試萬寧，都幾驚……驚部機壞啫。
當樓主一發文，就有不少用家走出來講其實上一代的Google Pixel 6 及 6a 都有這個問題，而且有部份用家話重新開機之後部機一樣有問題，要手動重啟先用得返，認真邪門。
究竟點解會出現這個問題？難道是異形搞鬼？當然不是，而是4K HDR攪的鬼。根據消息指，今次出現重啟的原因，主要是 Pixel 的色彩引擎支援的顏色空間不足，而偏偏4K HDR影片所需要處理的顏色又太多，於是攪到部機不勝負荷直接罷工，這個情況就好似用一些款式較舊或入門機玩一些大型手遊一樣。
其實Android手機重啟都已經不是第一天發生的事，好似早兩三年前，便曾經有一款手機wallpaper App，一用就自動重啟，而當年不單止Pixel中招，連 Samsung 都有份。話返今次件事，有機有問題，當然大家都向Google投訴，不過最離奇的是Google方面並無作出任何回應，反而是靜雞雞自己修復了問題就當無事發生過一樣，說到底 Android 用家對這種「鹽對應」都應該習以為常。
