近年手機不停開發快速充電技術，而且好似玩數字遊戲，你出完 60W ，我就出個 80W ，不過好似 Redmi 在 MWC 2023 發布話自己可以做到 300W 充電，都幾嚇人，而且更宣稱只要 5 分鐘就可以充滿部手機，都不知道要開心定擔心好。
口講無憑，所以今次小米仲拍埋條片俾你睇，以Redmi Note 12 Pro+ 為基礎的魔改版，採用特別訂做的電荷泵晶片，最高轉換率達 98% ，然後再由散熱入手，將充電時的熱量分散，而全條片計埋時俾你睇，不足 5分鐘就充滿手機，而電功率維持在 280W 的時間更超過 2 分鐘。
其實 Redmi 之前都試過表演快充，以240W 的功率在 9 分鐘內叉滿一部手機，而這個舊紀錄在之前仍未有其他品牌打得破。不過，有技術還有技術，到現時為止，仍未有一部 Redmi 或小米的手機可以支援 240W 快充，更莫講話 300W 快充，估計至少不會在今年出現。 不過，老實講就算今年出現，用家亦都未必夠膽用，始終快充會令電池過熱，就算可以在充電時有效散到熱，但並不代表充電過程過快不會對電池造成長遠影響，如果只為了貪快而令到手機每幾個月要換一次電，相信並不符合用家的期望。而且就算再忙都好，5分鐘充滿部手機同15分鐘充滿50%電，以現階段後者的技術都成熟過前者好多，至少不用怕會著火爆炸先，所以飛機可以繼續打，當睇戲囉。
